Mississippius

Mississippius

Mississippius amnis
Longitudo	6270 chm
Altitudo fontis	450 m
Decursus aquae	12 800 m³/s
Area systematis	2 980 000 chm²
Fons	Itasca
Ostium	Sinus Mexicanus
Regio	Civitates Foederatae Americae

Mississippius seu flumen Mississippiense, Anglice etiam agnominibus Old Man River ('Fluvius Senex') et Big Muddy ('Magnum Turbidum') notum, est amnis qui per decem civitates foederatas Americanas fluit, reipublicae longissimus, aquamque e maximis superficiebus siccans flumen. Longitudine systema Mississippii et Missurii in orbe terrarum tertium est, area pelvis hydrographicae sexta.

A Ferdinando de Soto, exploratore Hispanico, anno 1541 Mississipius repertum est. Saeculo XVIII finis erat, qui Ludovicianam, partem Novae Franciae et Novae Hispaniae a terris Imperii Britannici et Civitatum Foederatarum separaret. Usque adhuc interdum finis putatur, qui partem occidentalem Civitatum Foederatarum ab orientali separat.

Pons primus trans Mississippium (prope ad Itascam lacum)

Mississippius in Minneapoli et aqua cadens Sancti Antonii

Fluxus

E lacu Itasca (vel a rivis in eum fluentibus) in Minnesota oritur. Minneapolim et Urbem Sancti Pauli Minnesotae urbes maximae in ripis eius stant. POstea per confinium Minnesotae et Visconsiniae fluit, Visconsiniae et Iowae, Iowae et Illinoesiae, Illinoesiae et Missuriae; fluxus Mississippii superior usque ad Urbem Sancti Ludovici in Missuria habetur, ubi Missurius accola longissimus cum Mississippio coniungitur.

Pons trans Mississippium in Memphi

Fluxus medius brevis est, nam ab ostio Missurii usque ad ostium Ohii accolae aquosissimi habetur; decursus aquae Ohii in ostio maior, quam Mississipii est.

Fluxus inferior ab ostio Ohii usque ad deltam continuatur. Tennesiam ab Arcansia hic Mississippius separat; Memphis Tennesiae urbs hic ad ripam eius laevam aedificata est, a ripa autem dextra Arkansa accola fluxus inferioris maximus effundutur. Postea Arcansiam a Mississippia flumen separat et Missisisippiam a Ludoviciana; in Ludoviciana Rubribaculum civitatis caput et Novum Aurelianum urbs maxima et famosissima ad Mississippium patent.

Delta

Mississippius delta maximum areae 28,6 milia chm² habet in Ludoviciana civitate, ubi in sinum Mexicanum influit; regio autem, quae saepius Delta Mississippii^(en) nominatur, sensu geographico nec delta nec delta interius est.

Mississippius in Novο Aurelianο

Flumen Rubrum, quod antea tributarius Mississipii erat, nunc per Atchafalayam (in quam et pars Mississippii aquarum abit) in sinum Mexicanum se effundit.

Notum est Mississipii alveum principalem in delta mutari, nam priscum arenis obfusum fluvius relinquit ut bracchium; his locis talia bracchia bayou nominantur. Millennio secundo a.C.n. Bayou Teche alveus principalis fuit; a saeculo secundo vel tertio usque ad decimum Bayou Lafourche fuit alveus maximus. Nunc ad Atchafalayam moveri videtur.

Bibliographia

• Anfinson, John O.; Thomas Madigan, Drew M. Forsberg, et Patrick Nunnally (2003). The River of History: A Historic Resources Study of the Mississippi National River and Recreation Area. Sancti Pauli Minnesotae: U.S. Army Corps of Engineers, St. Paul District .
• Bartlett, Richard A. (1984). Rolling rivers: an encyclopedia of America's rivers. Novi Eboraci: McGraw-Hill. ISBN 0-07-003910-0 .
• Penn, James R. (2001). Rivers of the world: a social, geographical, and environmental sourcebook. ABC-CLIO. ISBN 1-57607-042-5 .
• Smith, Thomas Ruys (2007). River of dreams: imagining the Mississippi before Mark Twain. Rubribaculi Ludovicianae: Louisiana State University Press. ISBN 978-0-8071-3233-3 .
• Scott, Quinta (2010). The Mississippi: A Visual Biography. Columbiae Missuriae: University of Missouri Press. ISBN 978-0-8262-1840-7 .

Nexus externi

Lege Μισσισσιππής (ποταμός) ("Mississippius") apud Vicipaediam lingua Graeca antiqua scriptam