Aulus Didius Gallus Fabricius Veiento

Tabula votiva quam Fabricius Veiento et eius uxor Attica deae Celticae Nemetonae dedicavit.

Aulus Didius Gallus Fabricius Veiento (nescimus quando natus sit; mortuus est post annum 98) fuit senator Romanus primo saeculo. Ab Aulo Didio Gallo, consule suffecto anni 36, adoptatus est. Uxorem Atticam duxit. Fuit praetor, deinde anno 62 relegatus est; cuius rei causam Tacitus rettulit: "Haud dispari crimine Fabricius Veiento conflictatus est, quod multa et probrosa in patres et sacerdotes composuisset iis libris, quibus nomen codicillorum dederat. Adiciebat Tullius Geminus accusator venditata ab eo munera principis et adipiscendorum honorum ius, quae causa Neroni fuit suscipiendi iudicii, convictumque Veientonem Italia depulit et libros exuri iussit, conquisitos lectitatosque, donec cum periculo parabantur: mox licentia habendi oblivionem attulit." Vespasiano imperatore in senatum iterum adlectus est, ter (annis 74, 80, 83) consul creatus est. Praeterea sacerdos et consiliarius Domitiani imperatoris fuit, quod et a Iuvenale confirmatur. Anno 89 cum uxore imperatorem in expeditione contra Lucium Antonium Saturninum secutus est, qui purpuram sumpserat. Etiam Nerva imperatore auctoritas Fabricii magna fuit.

Fontes

• Cassius Dio, Historia Romana LXI.5.2
• Epitome de Caesaribus 12.5.
• Iuvenalis, Satirae III.184-5; IV.113 et 123-9
• Plinius, Epistulae IV.22.4; IX.13.13 et 19-20
• Tacitus, Annales XIV.50

Plura legere si cupis

• B. W. Jones, "Fabricius Veiento Again", The American Journal of Philology, 1971: 476-478
• William C. McDermott, "Fabricius Veiento", The American Journal of Philology, 1978: 129-148
• Steven H. Rutledge, Imperial inquisitions. Prosecutors and informants from Tiberius to Domitian, London, Routledge, 2001: 229-232

Nexus externi

• Fabricius 15 apud Paulys Real-Enzyklopädie der classischen Altertumswissenschaft