Esther Hillesum

Esther "Etty" Hillesum (nata Medioburgi die 15 Ianuarii 1914; interfecta in castris carceralibus Osvecimiae die 30 Novembris 1943) fuit philosopha et iuris consulta Batavica. Insuper linguas Slavicas callebat ac docebat.

Vita

Filia patris, qui multa legit et pervolutavit, saepe cum familia loca et scholas mutare debuit. Ludis anno 1916 finitis, gymnasium Daventriae frequentavit, patre rectore. Ibi lectiones Hebraicas secuta est, et in ultimis annis scholasticis coetui iuvenum Sionismum foventium adhaesit. Quos conventus, ubi vehementer de politicis et religiosis disputatum est, Eduardus Kleerkoper condiscipulus duxit. Absolutorium scholae anno 1932 nacta, domum familiae reliquit Amstelodamum petitura ad iurisprudentiae studia facienda. Una cum Henrico Wegerif, actuario et viduo, vitam degebat usque mensem Iunium 1943, mensem deportationis.

Praeter iurisprudentiam sibi novis campis aperuit: namque Amstelodami et Lugduni linguis Slavicis studere coepit apud Nicolaum van Wijk professorem egregium. Neque litteras (imprimis Russicas) neglexit. In diurnis commentariis persaepe notis allusionibusque apparebant Theodorus Dostoevskij et Leo Tolstoj et Rainerius Maria Rilke. Ad pecuniam faciendam, ipsa homines idioma Russicum privatim docuit. Esther in circulis liberalibus versans cum aliis studiosis Foedus contra Bellum et Fascismum condidit.

Anno 1941, cum exercitus Germanicus Nederlandiam occupavisset, cum Iulio Spier, praesago e manibus et psychoanalysis magistro Germanico, consuetudines contraxit.^[1] Mense Iulio 1942, benevola se praebuit, ut pro consilio Iudaeorum operam daret. Quem laborem mox abhorruit, quoniam revera de cooperationibus coactis cum aggressoribus Germanicis agebatur. Itaque sponte sua ad infirmos curandos in castra Westerbork in provincia Drenthia sita iit; fugam identidem recusavit. Mense Septembri 1943 cum parentibus et fratre Michaele in Poloniam deportata est. Antea, Esther diaria sua in manus Mariae Tunzing amicae cuiusdam commendaverat, quae post bellum in lucem prolata sunt.

Philosophia et exploratio

Eius notiones diariis epistulisque tenentur, ubi tam animae suae quam Iudaeis Batavicis vocem dat. Iulius Spier eam hortabatur, ut spiritum exercitationibus corporalibus augeret. Id, ut aliquando confessa est, fortitudinem animi corroboravit et limites contemplativos ampliores posuit. Hillesum terminos rationalismi pristini linquere coepit. Esther intellexit Deum homines vocare, ut ipsi active in praxi circumiacentia crudelia commutent et res meliorarent.^[2] Commentarii diurni in has linguas conversi sunt: Anglicam (1983), Danicam (1983), Norvegicam (1983), Suecicam (1983), Theodiscam (1983), Finnicam (1984), Lusitanicam (1984), Italianam (1985), Hispanicam (1985), Hebraicam (1985), Iaponicam (1985), Hungaricam (1985), Francogallicam (1985).

Ex anno 2006, Universitas Gandavensis in diaetis suis indagatoribus spatium dedit de philosophia Estheris Hillesum indaganda. Quod institutum nomen Etty Hillesum Onderzoekscentrum (EHOC) portat. Casa anno 2015 in urbem natalem translata in museum omnibus visendum redacta est.

Bibliographia

Ria van den Brandt, Klaas A. D. Smelik: Etty Hillesum in facetten. Uitgeverij Damon, Noviomagi Batavorum 2003, ISBN 90-5573-439-X.
Ria van den Brandt, Klaas A. D. Smelik: Etty Hillesum Studies: Etty Hillesum in context. Gorcum, Assen 2008, ISBN 978-0-8262-1797-4.
Meins G. S. Coetsier: God? … Licht in het duister: Twee denkers in barre tijden: de Duitse filosoof Eric Voegelin en de Nederlands-Joodse schrijfster Etty Hillesum. In: Ria van den Brandt, Klaas A. D. Smelik (ed.): Etty Hillesum Studies: Etty Hillesum in context. Gorcum, Assen 2008, ISBN 978-0-8262-1797-4.
J. Geurt Gaarland (ed.): Men zou een pleister op vele wonden willen zijn: Reacties op de dagboeken en brieven van Etty Hillesum. Balans, Amstelodami 1989.
Judith Koelemeijer: Etty Hillesum: het verhaal van haar leven. Uitgeverij Balans, Amstelodami 2022, ISBN 978-94-6382-174-2.

Nexus externi

Vicimedia Communia plura habent quae ad Esther Hillesum spectant.

Casa Estheris Hillesum visitatoribus et indagatoribus patens.
Vita apud FemBio.

Notae

↑ Patrick Woodhouse, Etty Hillesum: A life transformed (Londinii, Novi Dellii, Novi Eboraacl, Sydnei: Bloomsbury Academic, 2013), ISBN 978-1-84706-426-4, p. 17.
↑ Gideon Greif, "Ein abgeschnittenes Leben. Das Tagebuch von Etty Hillseum" apud: Nachforschungen zu individuellen Auseinandersetzungen mit dem Holocaust (Coloniae Agrippinae: 2003).

[1] Patrick Woodhouse, Etty Hillesum: A life transformed (Londinii, Novi Dellii, Novi Eboraacl, Sydnei: Bloomsbury Academic, 2013), ISBN 978-1-84706-426-4, p. 17.

[2] Gideon Greif, "Ein abgeschnittenes Leben. Das Tagebuch von Etty Hillseum" apud: Nachforschungen zu individuellen Auseinandersetzungen mit dem Holocaust (Coloniae Agrippinae: 2003).

[1]

[2]