Eumelus
Vide etiam paginam discretivam: Eumelus (discretiva).
Eumelus (Graece Εὔμηλος), Admeti et Alcestis filius, fuit dux Thessalorum ex Iolco et Pheris in bello Troiano. Undecim naves duxit[1] et eius equae omnium celerrimae in Achaeorum exercitu iudicabantur[2]. Patroclo mortuo certaminis ab Achille instituti particeps fuit[3]. Achille mortuo in ludis equi Eumeli vicerunt[4]. Inter heroas equo Troiano latentes a posterioribus auctoribus memoratur[5]. In Alcestide Euripidea Eumelus adhuc puer in scaenam inducitur ubi matrem mortuam deplorat[6].
Notae
[recensere | fontem recensere]- ↑ Ilias II 713.
- ↑ Ilias II.763-767.
- ↑ Ilias, ΧΧΙΙΙ 288–562.
- ↑ Apollodori Bibliotheca, epit. 5, 5. Sed secundum Quintum Smyrnaeum (Posthomerica, IV 563—592) Menelaus vicit.
- ↑ Posthomerica, XII 347; Tryphiodori Ilii excidium, 171.
- ↑ Versus 393-415.