Gaslight (pellicula 1944)
| Gaslight (1944) | |
|---|---|
.jpg) | |
| Dispositor | Georgius Cukor |
| Primi actores | Ingrid Bergman Carolus Boyer Iosephus Cotten |
| Duratio | 114 minuta |
| Natio | Civitates Foederatae |
| Lingua | Anglica |
Gaslight est pellicula formidulosa a Georgio Cukor disposita, in qua Ingrida Bergman, Carolus Boyer, et Iosephus Cotten prodeunt. Quae pellicula, cuius primum tirocinium mense Maio 1944 positum est, in fabula Gas Light a Patricio Hamilton anno 1938 scripta posita est.[1] Bergman hac pellicula praemium Oscar feminae datum ob optimi generis partes primarias meruit.
Argumentum
[recensere | fontem recensere]Anno 1875, Londini aevo Victoriano, Alicia Alquist cantrix dramatica praeclara, in domo sua interficitur. Eodem anno, Paula neptis eius consternata in Italiam mittitur, ut vestigia amitae sequatur.
Aliquot annis post, Paula clavilistae Gregorio Antonio post vehementem consuetudinem duarum septimanarum nubit, et cum marito in domo vacua amitae considit. Paula cum memoria caedis amitae luctatur, et Gregorius, ut supellex Aliciae in tabulato summo conservetur, proponit. Cum Paula epistulam reperit a quodam Sergio Bauer ad amitam missam, Gregorius violenter agit, sed mox se excusat.
Gregorius ancillam iuvenem, Nanceam, conducit flagitatque, ne uxorem suam "animo suspensam" umquam perturbet. Praeterea in Paula id reprehendit, quod nimium obliviosa sit, nam ea, dum turrim Londinii invisit, fibulam sibi a viro datam, quam in pera manuaria habebat, invenire non potest. Adde quod Paula crepitus ex tabulato summo audit iisque male turbatur. Praeterea absente Gregorio lucem gasalem sine causa manifesta obscurari animadvertit. Quas res Gregorius ad phantasias relegat.
Multis rebus animus Paulae commovetur. Solitudo et sollicitudo eius animum intendit Briani Cameron, inspectoris Scotland Yard, qui a puero Paulam admiratus est. Casum insolutum recludere conatus gemmas Aliciae donatas numquam post caedem illius repertas esse animadvertit.
Gregorius uxorem suam a mundo segregat, eamque adducit, ut se, quod picturam quandam celaret, cleptomania laborare credat et nimis aegram esse, ut in publicum prodeat. Id quidem Paulam prohibere non potest, quin cum amicis convivatur, sed eam furti horologii sui accusat. Paula, quod horologium cum in [[perula manuaria] sua forte invenit, hysterica coram hospitibus fit. Gregorius, cum Paulam domum vehit, indignatus eius matrem in amentium valetudinario decessisse dicit, negatque epistulas a Sergio Bauer scriptas numquam exstitisse. Paula sanitatem suam dubitat et frangitur. Gregorius Paulam in asylum mittere cogitat.
Interim Cameron per exploratorem speculatur Gregorium, cur saepe domo relicta desertum aedificium vicinum visitet. Absente Gregorio, Cameron Paulae adest crepitusque tabulati summi et luces gasales micantes veras esse confirmat, concluditque Gregorium per vicinum aedificium in tabulatum summum suum ingressum, ut bona Aliciae investigaret. Cum accenduntur luces gasales tabulati summmi, luces pedeplanorum reducuntur. Cameron mensam Gregorii aperit, et Paula epistulas invenit a Sergio Bauer missas, quas maritus eius phantasias esse adfirmaverat. Constat igitur "Gregorium" reapse Sergium Bauer esse, qui Aliciam occidit, sed ab iuvene Paula perturbatus erat, antequam gemmas eius inveniret. Consilium ceperat, ut Paulam in matrimonium duceret, nam eo modo aditus ad res Aliciae sibi praeberi cogitavit.
Simul Sergius/Gregorius gemmas invenit conspicuas, in unam de praeclaris vestbus Aliciae insutas. In tabulatum terrenum redit mensamque suam sine clausura invenit. Paulam animà defatigatam de mensa scriptoria interrogat, et Paula mensam ab amico reclusam esse confitetur. Apparet Cameron, inciditque in Sergium, quem in tabulatum summum persecutus ad sellam vincit. Postremo Paula, se mente sana esse confisa, sola relinquitur cum Sergio, qui se exsolvi iubet. Contra, Paula cavillans, an culter quem in manu habeat verus sit, dubitat. Etiam fibulam quae evanuit invenit. Cum Sergius a vigilibus aufertur, Cameron sua dicit interesse, ut Paulam denuo videat.
Partium distributio
[recensere | fontem recensere]- Partes primariae
- Carolus Boyer – Gregorius Anton/Sergius Bauer
- Ingrida Bergman – Paula Alquist Anton
- Josephus Cotten – Brianus Cameron
- Partes secundariae
- Dame May Whitty – Bessie Thwaites
- Angela Lansbury – Nancy Oliver
- Barbara Everest – Elizabetha Tompkins
- Emil Rameau – Maestro Guardi
- Edmund Breon – General Huddleston, Brians övervakare
- Halliwell Hobbes – Dominus Mufflin
- Heather Thatcher – Mildreda Dalroy
- Laurentius Grossmith – Fridericus
- Jakob Gimpel – Clavilista
Notae
[recensere | fontem recensere]- ↑ Dictio Anglica gaslighting ducta eat a titulo huius fabulae.
Bibliographia
[recensere | fontem recensere]- DiGiulio, Sarah (2018) What is gaslighting? And how do you know if it's happening to you?, 13 Iulii.
- Duignan, Brian (2024) Gaslighting. Britannica, 5 Decembris.
- Wilkinson, Alissa (2017) What is gaslighting? The 1944 film Gaslight is the best explainer. Vox, 21 Ianuarii.
Nexus externi
[recensere | fontem recensere]- Recensio paucorum verborum
- Praesentatio apud IMDb
- "Das Haus der Lady Alquist" - apud: filmdienst.de