Georgius Dossin

Georgius Dossin (natus Wandre in Wallonia die 4 Februarii 1896 - mortuus Leodii die 8 Decembris 1983) fuit philologus et epigraphus Belgicus scripturae cuneiformi et antiquis Mesopotamiae linguis deditus.

Cursus honorum

Anno 1923 thesim ex epistulis ad primam Babyloniacam dynastiam pertinentibus (saec. XVIII ante C.n.) defendit quas edidit atque simul commentariis ornavit. Inter 1924 et 1935 historiam artis in Universitate Leodiensi profitebatur. Inter 1929 et 1955 linguam Accadicam Bruxellis docebat. Post bellum inter 1951 et 1966 Leodii assyriologiam et grammaticam comparatam linguarum Semiticarum docebat. Inter discipulos memorandi sunt Iohannes Robertus Kupper qui dissertationem de gentibus vagabundis in Mesopotamia publicavit et nonnullos textus Mari repertos edidit necnon Andreas Finet qui linguam Marianam descripsit. Kupper Georgio Dossin Leodii successit, Andreas vero Finet Bruxellis. Alius discipulus Henricus Limet linguae Sumericae vitam dedicavit.

In Academiam Regiam Belgiae cooptatus, anno 1958 insuper in Academiam Inscriptionum Francogallicam adlectus est ut socius extraneus.

De archaeologicis expeditionibus

In Medium Orientem quoque nonnumquam iter faciebat cum amico Parisiensi Thureau Dangin atque investigationibus archaeologicis operam dabat. Ita ab anno 1937 usque ad bellum et postea inter 1951 et 1954 et rursus inter 1961 et 1966 archaeologum Andream Parrot ad situm antiquae urbis Mari quotannis comitabatur et inscriptionibus legendis praeerat. Postea seriei Archives Royales de Mari conditor fuit et prima volumina transcriptionum et translationum ipse edidit.

Nonnullae publicationes

• 1933ː Lettres de la première dynastie babylonienne, Geuthner (Textes cunéiformes du Louvre XVII)
• 1934ː Lettres de la première dynastie babylonienne. II, Planches LXV à CXXVIII, Geuthner. (Textes cunéiformes du Louvre XVIII)
• 1938ː "Les archives épistolaires du palais de Mari", Syria. Archéologie, Art et histoireː 105-126
• 1939ː "Les archives économiques du palais de Mari", Syria. Archéologie, Art et histoire ː 97-113
• 1950ː Correspondance de Šamši-Addu. (Archives royales de Mari, I), Geuthner. Recensio critica
• 1951ː Correspondance de Šamši-Addu (continuatio). (Archives royales de Mari, IV), Geuthner. Recensio critica
• 1952ː Correspondance de Iasmaḫ-Addu, (Archives royales de Mari, V), Geuthner.
• 1967ː Correspondance féminine, (Archives royales de Mari, X), Geuthner. Nota authoris Recensio critica Andreae Parrot

Fontes

• Laurent Colonna d'Istria, "Les débuts de l'épigraphie à Mariː une aventure franco-belge" in Mari en Syrie : renaissance d'une cité au 3e millénaire (curantibus Arnaud Quertinmont et Sophie Cluzan), Musée royal de Mariemont, 2023ː 29-42.

Nexus externi

• Archives Royales de Mari. Lutetiae: Geuthner ac deinde Ed. Recherches sur les civilisations, 1942-2012. 32 vol. [1].
• Oratio funebris in Academia Inscriptionum
• "Assyriological Centre Georges Dossin" - opus fundatum