Hymnus Europae

Hymnus Europaeus est hymnus Unionis Europaeae et Consilii Europae.

Musica hymni est pars ex ultimo motu symphoniae nonae Ludovici van Beethoven, quae vocatur "Ode ad gaudium". Huic symphoniae verba a Friderico Schiller pacta sunt ("Freude, schöner Götterfunken"), quae ad Europam non spectant. Itaque Raimundus Fleischmann, Batavus suasit ut Hymnus Europaeus Latine conscriberetur.

Attamen hodie hymnus sine verbis canitur, ut musica sola virtutes pacis, libertatis et concordiae proferat.

Hymnus Europaeus quem composuit Tuomo Pekkanen

Europaei, gaudeamus,

foedus firmum fecimus,

laetum carmen concinamus,

Unionem iunximus,

constitutis aequitatis,

libertatis iuribus,

in commune comprobatis,

Europaeis legibus.

Cum maioribus minores

nationes valeant,

propagantes pacis mores

vivant, crescant, floreant,

praeferant humanitatem,

proferant iustitiam,

populorum paritatem,

candidam concordiam.

Gentes semper sociatae,

sic et porro pergite,

Unionem confirmate,

in Europam credite!

Tuomo Pekkanen scripsit se stropham Schillerianam observavisse, in versibus octosyllabis ultimum vocabulum semper accentum habere in paenultima syllaba, in heptasyllabis autem in antepaenultima, alternationem rimarum esse ababcdcd efefghgh ijij, sicut apud Schillerum.

«Hoc carmen ad Unionis Europaeae auctoritates missum est a Iosepho Leinen, praeside Unionis Europaeorum Foederalistarum et deputato Europaeo». Patricius Cox, praeses Coetus Legatorum Europaeorum, scripsit «sibi carmen Tuomonis Pekkanen placere, haec tamen addenda esse verba: "omnes homines fratres fore"».

Hymnus Europaeus quem composuerunt Petrus Roland et Petrus Dies

Anno 2003, Petrus Roland Petro Diem et universitate Vindobonensi iuvantibus carmen latinum pro hymno scripsit:

Est Europa nunc unita

et unita maneat;

una in diversitate

pacem mundi augeat.

Semper regant in Europa

fides et iustitia

et libertas populorum

in maiore patria.

Cives, floreat Europa,

opus magnum vocat vos.

Stellae signa sunt in caelo

aureae, quae iungant nos.

Littera praesidis Consilii Europaei

Tam placuit illud carmen ut Roland acciperet epistulam gratulatoriam Praesidis Consilii Europaei Hermanni Van Rompuy:

Pro litteris tuis, quas Idibus Ianuariis accepi, tibi gratias ago. Magno cum studio hymnum Europae lingua Latina scriptum, legi. Mihi non est ingenium canendi, sed inceptum tuum mihi maxime placet. Spero consilia tua hymni Europae commendandi lingua Latina prospere eventura esse. Vale!—Hermannus Van Rompuy, 2010.

Notae

Porta Unionis Europaeae

Nexus interni

• Vexillum Europae

Nexus externus

• Hymnus Europae

Musica

Haec stipula ad musicam spectat. Amplifica, si potes!

De Unione Europaea

Praecursores Communitates (Communitas carbonis et chalybis · Communitas oeconomica) Instituta Consilium Europaeum · Commissio · Consilium · Parlamentum · Argentaria primaria · Curia · Curia rationum Comitia Anni 1979 · Anni 2014 · Anni 2019 Signa Dies Europae · Europa et taurus · Hymnus · Vexillum Varia Euro · Linguae · Index linguarum in isdem linguis notatarum · Societas Europaea · Societas privata Europaea · Societas Cooperativa Europaea · Eurostat · Life · Praemium Sacharov · Ministerium a rebus exteris · Officium vigilum · Schola Europaea · Ducatus aërinavigationis · Index actuum legiferorum Unionis Europaeae Rei publicae status Charta de iuribus fundamentalibus · Foedus Romae ictum (Foedus de operatione Unionis) · Foedus Traiecti Mosae ictum (Foedus de Unione) Emendationes Foedus Bruxellis ictum · Foedus Parisiis ictum · Foedus Schengis ictum · Actus unicus Europaeus · Foedus Amstelodami ictum · Foedus Nicaeae ictum · Foedus Olisipone ictum Porta