Thebae (Boeotia)

Thebae (Boeotia)

Res apud Vicidata repertae:

Civitas: Graecia
Locus: 38°19′15″N 23°19′4″E
Numerus incolarum: 21 545, 21 929, 20 038, 22 883
Situs interretialis
Nomen officiale: Θήβα

Gestio

Procuratio superior: Thiva Municipality, Commune of Thiva, Viotia

Geographia

Superficies: 830 chiliometrum quadratum

Thebae (Graece Θῆβαι, Neograece Θήβα) sunt urbs Graeciae, a septentrionibus montis Cithaeronis, qui Boeotiam ab Attica dividit, et a meridie planitiei Boeoticae sitae. Thebae inter locos maximi momenti sive mythologiae Graecae sive rerum in Graecia antiqua gestarum pertinet. In urbe hodierna museum archaeologicum, acropolis nomine Cadmea (sc. arx) et sparsae antiquitatis reliquiae visuntur. Thebae his diebus est urbs Boeotiae maxima.

Demus

Thebarum demus anno 2011 in administratione renovanda (vide: Libellus Callicratis) his quattuor demis pristinis coniugendis, qui ex tunc "unitates populares" (Graece: δημοτική ενότητα) sunt, formatus est:

Unitas popularis	Numerus incolarum
Plataeae (Πλαταιές, antea Πλαταιαί)	4 205
Thebae (Θήβα)	24 443
Thisbe (Θίσβη)	3 276
Bagia (Βάγια)	4 162
Summa incolarum	36 086

De aetate mythologica

Arx Cadmea, quae postea in urbem Thebarum profecta est, a Cadmo condidisse traditur. Amphion Zethusque moenia amplificantes septem portas inseruerunt, ex quo Thebae "heptapylae" (επτάπυλος valet "septem portas habens") nominabantur, contrariae "Thebis centum portarum" Aegypti. Etiam fabulae de Heracle, Dionysio Laioque Thebis annexae sunt. Heracles, Niobe, Oedipus et Antigone ibi nati sunt. Oedipi filii gemini Eteocles et Polynices de regno certantes se invicem necaverunt (vide: Aeschylus, Septem contra Thebas).

Memoriae traditum est fines Thebanorum primum ab Ogyge, rege Ectenum, aboriginum Boeotiae, possessos esse. Post Ectenes fines Boeotiae ab Hyantibus et Aonibus occupatos esse, quoad Cadmus cum exercitu Poenico finibus potitus Thebas condiderit.

Reges Thebarum aetatis mythologicae hi sunt ordine expositi:

• Cadmus
• Pentheus
• Polydorus
• Nycteus
• Lycus
• Labdacus
• Lycus (redux)
• Amphion et Zethus
• Laius
• Creon
• Oedipus
• Polynices
• Eteocles
• Creon
• Lycus
• Laodamas
• Thersander
• Peneleus
• Tisamenus
• Autesion
• Damasichthon
• Ptolemaeus
• Xanthus

Praeter supra nominatos in mythologia Graeca etiam Amphitruo rex Thebarum invenitur. Post Xanthum Thebani monarchiam deposuerunt.

De aetate historica

• Inter effossiones archaeologicas in Thebarum regione factas sedes Mycenaea et tabulae fictiles scriptura quae dicitur Linearis B scriptae inventae sunt potestatem loci Aetate Aenea demonstrantes.
• Antiquitate Thebae fuerunt maxima Boeotiae urbs et Boeotico Foederi praefuit.
• Maximus Athenarum adversarius Persico bello, cum Xerxes anno 480 a.C.n. Graeciam invasit, in Persarum partes transierunt.
• Post Peloponnesium bellum Athenasque devictas, Lacedaemonii principatum Graeciae obtinuerant. Copiae Thebarum Epaminonda duce Pugna Leuctrica anno 371 a.C.n. Spartae imperium finiverunt.
• Sacra cohors (Thebana) Thebarum Chaeronensi pugna anno 338 a.C.n. inclute ceciderunt a Philippo Alexandroque victi.
• Antequam anno 335 a.C.n. ab Alexandro Magno deletae sunt, Thebae erant maxima Graeciae potestas illius temporis.
• Tempore Byzantino urbs ob sericum illustris fuit.

Varia

Hordeum in pago Thebano cultum Archestratus saeculo quarto a.C.n. laudavit, sed post Eresium (insulae Lesbi) ordinavit:

Principio munus eloquar Cereris	Πρῶτα μὲν οὖν δώρων μεμνήσομαι ἠυκόμοιο
pulchra coma ornatae, amice Mosche: haec vero tu mente repone.	Δήμητρος, φίλε Μόσχε· σὺ δ´ ἐν φρεσὶ βάλλεο σῇσιν ...
Thebis etiam, quae portis septem patent, probam	Ἐστὶ δὲ κἀν Θήβαις ταῖς ἑπταπύλοις ἐπιεικῆ
et in Thaso et in quibusdam aliis oppidis nancisceris.	κἀν Θάσῳ ἔν τ´ ἄλλαις πόλεσίν τισιν.